سعودی آرامکو دنیا کی سب سے بڑی کمپنی بن گئی، ایپل کو پیچھے چھوڑ دیا

سعودی عرب میں تیل کی سرکاری کمپنی آرامکو دنیا کی سب سے بڑی کمپنی بن گئی ہے۔ آرامکو کے شیئرز کی قیمت بڑھ کر 46.20 ریال ہو گئی ہے۔ میڈیا رپورٹ کے مطابق آرامکو کمپنی کی مالیت 2.464 ٹریلین ڈالر ہو گئی ہے جس کے بعد اب وہ ایپل سے بھی آگے بڑھ گئی ہے۔ عالمی مارکیٹ میں ایپل کمپنی کی مالیت 2.461 ٹرلین ڈالر ہے اور ترتیب کے اعتبار سے دوسرے نمبر پر آ گئی ہے۔ عالمی منڈی میں تیل کی قیمت 100 ڈالر فی بیرل ہونے سے آرامکو کمپنی کو بڑا فائدہ ہوا ہے جبکہ امریکی اسٹاک مارکیٹ میں گراوٹ کی وجہ سے ایپل اور ٹیکنالوجی کی دیگر کمپنیاں متاثر ہوئی ہیں۔ واضح رہے کہ کورونا کی پابندیوں کے عروج کے زمانے میں ٹیکنالوجی کے شعبے سے وابستہ کمپنیوں کے کاروبار میں کافی تیزی آئی تھی آرامکو اور ایپل کے بعد عالمی مارکیٹ میں مائیکرو سافٹ تیسرے نمبر پر آتی ہے جس کی مالیت 1.979 ٹریلین ڈالر ہے۔