غریب ملکوں کو کورونا سے بچاؤ کی ویکسین کی کمی کا سامنا ہے

عالمی ادارہ صحت (ڈبلیو ایچ او) کا کہنا ہے کوویکس پروگرام کے تحت وافر مقدار میں ویکسی نیشن فراہم نہ کیے جانے کے سبب غریب ملکوں کو کورونا سے بچاؤ کی ویکسین کی کمی کا سامنا ہے۔ ڈبلیو ایچ او کے سینئر مشیر نے کہا ہے کہ کوویکس پروگرام کے تحت 131 ملکوں کو 9 کروڑ خوراک کی فراہمی ناکافی ہے۔ انہوں نے کہا کہ آبادیوں کو وائرس سے بچانے کے لئے یہ ناکافی ہے جبکہ کچھ افریقی ملکوں میں تیسری لہر کا سامنا ہے۔ افریقی صدر کا کہنا ہے کہ افریقہ میں 40 ملین ڈوزز لگائی گئیں، یہ 2 فیصد سے بھی کم آبادی کو لگائی گئی ہے۔ عالمی ادارہ صحت اور دیگر عالمی تنظیموں کی سربراہی میں قائم کوویکس پروگرام کے تحت ابتدا میں 2021 ء کے اختتام تک دنیا بھر میں 2 ارب خوراکیں پہنچانے کا ہدف رکھا گیا تھا، لیکن ویکسین بنانے میں تاخیر، سپلائی میں پریشانی کی وجہ سے قلت پیدا ہو رہی ہے۔ دوسری جانب یوگنڈا، زمبابوے، بنگلادیش بھی ویکسین ختم ہونے کا اعلان کر چکے ہیں۔