جسٹس کھوسہ کا مشرف غداری کیس نمٹانے میں کلیدی کردار

سبکدوش ہونے والے چیف جسٹس آف پاکستان آصف سعید کھوسہ نے سابق فوجی حکمران جنرل (ر) پرویزمشرف کیخلاف غداری مقدمہ نمٹانے میں کلیدی کردار ادا کیا۔ سینئر وکلا کا ماننا ہے کہ پاکستان کی تاریخ میں جسٹس کھوسہ کانام یاد رکھا جائے گا۔ سیاسی و عدالتی حکام کیخلاف فیصلے دینے والے جسٹس کھوسہ جو 20 دسمبر کو رٹائر ہو رہے ہیں ،انھیں جرات مند جج کی حیثیت سے یاد رکھا جائے گا۔ وہ این آراو کیس میں سات رکنی بینچ کا حصہ تھے جس نے سابق وزیراعظم یوسف رضا گیلانی کو 2010 میں نااہل کیا تھا۔ قانونی ماہرین کے مطابق آرمی چیفس کی توسیع اورمشرف غداری مقدمے میں فیصلوں کے بعدعدلیہ طاقتورادارہ بن کر ابھری ہوئی ہے۔ غداری کا مقدمہ ن لیگ کے اقتدارمیں آنے کے بعد نومبر 2013ء میں شروع کیا گیا تھا تاہم متعدد وجوہات کے باعث زیرالتوا رہا۔ ایک سینئر اہلکار نے ایکسپریس ٹریبیون کو بتایا کہ یہ مقدمہ متعدد بار مردہ ہوا تاہم یہ جسٹس کھوسہ تھے، جنھوں نے اسے زندہ رکھا۔