کشمیر میں بھارتی انتہا پسندانہ فیصلے، پاکستان کے پاس کیا آپشنز ہیں؟

مقبوضہ کشمیر کو بھارت میں شامل کئے جانے کے بھارتی انتہا پسندانہ فیصلے اور اس مسئلے کو مذاکرات کے ذریعے حل کرنے کے کئی وعدوں سے پھر جانے سے نمٹنے کیلئے پاکستان کے پاس کون سے آپشنز ہیں؟ عالمی، دو طرفہ اور ملکی محاذوں پر لئے جانے والے تمام آپشنز کا واضح بنیادی مقصد نئی دہلی کو مقبوضہ کشمیر کے قبضے سے پیچھے ہٹنے پر مجبور کرنا ہو گا۔ پاکستان کیلئے ایک رستہ اپنے دوست ممالک کو ساتھ ملانا ہے اور انہیں مشورہ دینا ہے کہ وہ بھارت پر اپنا اثر و رسوخ استعمال کریں تاکہ وہ اپنے تشدد آمیز اقدام سے پیچھے ہٹے۔ وزیر اعظم عمران خان نے فوری طور پر ترکی اور ملائیشیا کے اعلیٰ رہنماؤں سے بات کر کے بالکل ٹھیک کیا جس میں انہیں صورتحال کی سنگینی کے حوالے سے بریفنگ دی گئی۔