برٹش ایئر ویز کی پاکستان کے لیے گیارہ سال بعد پروازوں کا آغاز

برٹش ایئر ویز کی پاکستان کے لیے 11 سال بعد پروازوں کا آغاز ہو گیا ہے، پہلا طیارہ اسلام آباد ایئر پورٹ پر لینڈ کر گیا۔ پرواز میں دو سو سے زائد مسافر سوار تھے، برٹش ایئرویز نے 2008 میں پاکستان کے لیے آپریشنز معطل کیے تھے۔ برٹش ایئرویز لندن اور اسلام آباد کے درمیان پروازیں شروع کرے گی. برٹش ایئر ویز کی جانب سے جاری کیے گئے پریس ریلیز کے مطابق ہفتے میں 3 پروازیں لندن اور اسلام آباد کے درمیان چلیں گی، جن کے لیے بوئنگ 787 طیارے استعمال کیے جائیں گے۔ اردو بولنے والے پاکستانیوں یا پاکستانی نژاد برطانوی شہریوں کی سہولت کیلئے اردو بولنے والوں کی خدمات ان پروازوں کیلئے بھی لی گئی ہیں۔ برٹش ایئر ویز کے چیف کمرشل آفیسر اینڈریو بریم نے کہا ہے کہ یہ نیا روٹ شروع کرنے پر برٹش ایئر ویز کو بہت خوشی ہے۔